सत्सङ्ग प्रतिष्ठान नेपालका सत्सङ्ग कार्यक्रमहरु सम्पन्न भएका छन् । विभिन्न विद्यालय, सङ्घ संस्था र प्रतिष्ठानहरुको सहयोगमा आयोजना हुने सत्सङ्ग कार्यक्रमहरु विभिन्न समयमा सम्पन्न भएका छन् । हालै बुद्ध ज्योति इङ्लिसु बोर्डिङ स्कुल, रत्ननगर, चितवनका आदरणीय अभिभावक र शिक्षकहरुका साथ उत्प्रेरणा तथा अभिमुखीकरण कार्यक्रम सम्पन्न भएका छन् ।
असल अभिभावक कसरी बन्न सकिन्छ भने प्रश्न वरपर रहेर उक्त विद्यालयका करिब १०० जना अभिभावकका लागि उत्प्रेरणा तथा अभिमुखीकरण गरिएको थियो ।
अभिभावकको अभिमुखीकरणपछि विद्यालयका शिक्षकहरुका साथमा सम्पन्न कार्यक्रममा शिक्षकीय मूल्य, गरिमा आदर्श र विधिबारे चर्चा गरिएको थियो ।
विद्यालयका प्राचार्य वैकुण्ठ मरहट्ठाको विशेष उपस्थितिमा अभिप्रेरणाको सहजीकरण सत्सङ्ग प्रतिष्ठान नेपालका अध्यक्ष आचार्य लक्ष्मण भण्डारीले गर्नुभएको थियो ।
त्यसअघि जनप्रिय पब्लिक स्कुलका कक्षा ६ देखि कक्षा १० सम्म अध्ययनरत बाबुनानीका लागि पनि विशेष उत्प्रेरणाको कार्यक्रम सम्पन्न भएको छ । विद्यालयका प्राचार्य भानुप्रसाद अर्यालको विशेष सक्रियतामा आयोजित उत्प्रेरणा कार्यक्रम अभिभावक र शिक्षकहरुका लागि पनि आयोजना गरिएको थियो । शिक्षक, विद्यार्थी र अभिभावकका विभिन्न शैक्षिक सत्सङ्गका कार्यक्रमको संयोजन सोही विद्यालयका प्रशासनिक व्यक्तित्व विश्वराज अर्यालले गर्नुभएको थियो ।
जीवनदर्शन मनुष्य समाज र मानवीय जीवनपद्धतिका उज्याला आयामहरूलाई उद्घाटित गर्ने पवित्र उद्देश्यसहित सञ्चालित अनलाइन तथा मासिक पत्रिका हो । यसमा प्रकाशित हुने सबै प्रकारका सामग्री केवल कल्याण, कर्तव्य, अध्यात्म, आशा र उत्प्रेरणामा आधारित हुने गर्दछन् । यहाँ प्रकाशित हुने लेखरचनाले व्यक्तिभित्रको काम, क्रोध, लोभ, मोह, मद र मात्सर्यलाई घटाउँदै प्रेम, करुणा, विनय, स्वास्थ्य, सेवा र स्वाध्ययनलाई बढाउने प्रयास गर्ने छन् । हत्या, हिंसा, मारकाट, झैझगडा, छिनाझपटी, लुटपाटका दुःखदायी समाचारहरूबाट आशा, भरोशा, प्रेम, स्नेह, आनन्द, शान्तिजस्ता सकारात्मक समाचार र विचारतर्फ अभिप्रेरित हुन आम नेपालीलाई सहयोग पुगोस् भन्नु नै जीवनदर्शनको खास अभीष्ट हो ।
