बाबुनानीलाई हामीले सोचेजस्तै अथवा त्योभन्दा पनि राम्रा बनाउनका लागि विद्यालय, घरपरिवार र विद्यार्थी स्वयम्को भूमिका महत्त्वपूर्ण हुने हुनाले अभिभावकका तर्फबाट थप सक्रियता अभिवृद्धि गर्न र अभिभावकीय मूल्यबारे अभिभावकलाई उत्प्रेरित गर्नका लागि कार्यक्रमको आयोजना गरिएको
बकेना बालबाटिका विद्यालयले आफ्ना सबै अभिभावकहरूका लागि अभिभावक शिक्षा कार्यक्रमको आयोजना गरेको छ । मन्टेश्वरी शिक्षाका लागि चितवन र यस वरपरका क्षेत्रमा निकै परिचित मानिएको बकेना बालबाटिकाले गुणस्तरीय र व्यवहारमा आधारित शिक्षा प्रदान गर्दै आइरहेको छ ।
प्ले ग्रुपदेखि कक्षा ६ सम्म अध्ययन गर्ने करिब चार सय बालबालिका यहाँ अध्ययन गरेर थप कक्षामा अध्ययन गर्न जुन विद्यालयमा जान्छन्, ती विद्यार्थी अधिकांशले त्यहाँ पढाइलेखाइसहित सबै विषयमा सबैलाई उछिन्ने गरेका छन् ।
हालै विद्यालयले दियालो फुडल्यान्ड क्षेत्रपुरमा आफ्ना अभिभावकहरुका लागि ‘अभिभावक उत्प्रेरणा, अभिमुखीकरण तथा पुनर्ताजगी’कार्यक्रमको आयोजना गरेको छ । फागुन ११ गते सोमबारका दिनमा बिहानी सत्रमा प्ले ग्रुपदेखि कक्षा एककेजीसम्म अध्ययन गर्ने बाबुनानीका करिब एक सय पचार अभिभावक सो अभिमुखीकरण कार्यक्रममा उपस्थित हुनुभएको थियो ।
कार्यक्रमको दोस्रो सत्र दिउँसो एक बजेदेखि ४ बजेसम्म सञ्चालन भएको थियो, जहाँ कक्षा एकदेखि कक्षा ६ सम्म अध्ययन गर्ने बाबुनानीका अभिभावकको सहभागिता रहेको थियो । समाजका विशिष्ट पेसा, व्यवसाय र कर्ममा रहेका अभिभावक सो समयमा उपस्थित हुनुहुन्थ्यो ।
कार्यक्रममा विद्यालयका प्राचार्य प्राञ्जना श्रेष्ठले कार्यक्रम गर्नुको औचित्यबारे चर्चा गर्दै बाबुनानीलाई हामीले सोचेजस्तै अथवा त्योभन्दा पनि राम्रा बनाउनका लागि विद्यालय, घरपरिवार र विद्यार्थी स्वयम्को भूमिका महत्त्वपूर्ण हुने हुनाले अभिभावकका तर्फबाट थप सक्रियता अभिवृद्धि गर्न र अभिभावकीय मूल्यबारे अभिभावकलाई उत्प्रेरित गर्नका लागि कार्यक्रमको आयोजना गरिएको बताउनुभयो ।
विद्यालयका संयोजक अञ्जना खरेलले सञ्चालन गर्नुभएको कार्यक्रममा लेखक, शिक्षासेवी एवम् उत्प्रेरक वक्ता आचार्य लक्ष्मण भण्डारीले उत्प्रेरणा तथा अभिमुखीकरणमा सहजीकरण गर्ने काम गर्नुभएको थियो । दुवै कार्यक्रममा गरी ३०० भन्दा धेरै अभिभावकको उपस्थिति रहेको थियो ।
जीवनदर्शन मनुष्य समाज र मानवीय जीवनपद्धतिका उज्याला आयामहरूलाई उद्घाटित गर्ने पवित्र उद्देश्यसहित सञ्चालित अनलाइन तथा मासिक पत्रिका हो । यसमा प्रकाशित हुने सबै प्रकारका सामग्री केवल कल्याण, कर्तव्य, अध्यात्म, आशा र उत्प्रेरणामा आधारित हुने गर्दछन् । यहाँ प्रकाशित हुने लेखरचनाले व्यक्तिभित्रको काम, क्रोध, लोभ, मोह, मद र मात्सर्यलाई घटाउँदै प्रेम, करुणा, विनय, स्वास्थ्य, सेवा र स्वाध्ययनलाई बढाउने प्रयास गर्ने छन् । हत्या, हिंसा, मारकाट, झैझगडा, छिनाझपटी, लुटपाटका दुःखदायी समाचारहरूबाट आशा, भरोशा, प्रेम, स्नेह, आनन्द, शान्तिजस्ता सकारात्मक समाचार र विचारतर्फ अभिप्रेरित हुन आम नेपालीलाई सहयोग पुगोस् भन्नु नै जीवनदर्शनको खास अभीष्ट हो ।
