बालबालिकाको शिक्षा, स्वास्थ्य, संस्कारसम्बन्धी सकारात्मक विकासका लागि अभिभावक आफैँमा सचेत हुन अत्यन्त जरुरी छ । आफूलाई गरिनुपर्ने आधारभूत स्याहार, स्नेह र रेखदेख उनीहरूको अधिकार पनि हो । यसै विषयको सेरोफेरोमा रही गत असार २१ गते भरतपुर महानगर पालिका वडा नं ०३ ले युवा समाज नेपालको समन्वयमा मानव अधिकारका लागि अभिभावक शिक्षा विषयक कार्यक्रमको आयोजना गर्यो ।
कार्यक्रममा वडाभित्र रहेका विभिन्न सामुदायिक विद्यालय तथा संस्थागत विद्यालयका प्रतिनिधि अभिभावक, विभिन्न टोल सुधारका प्रतिनिधि तथा महिला समूहका आमा सदस्यहरूको सहभागिता रहेको थियो ।
कार्यक्रममा प्रमुख अतिथिका रूपमा मन्तव्य व्यक्त गर्दै वडाका अध्यक्ष विकास थापाले अभिभावक शिक्षाको आवश्यकताको चर्चा गर्दै यस्ता सकारात्मक संस्कार र सोँच विकासका लागि वडाले सक्दो सक्रियता प्रकट गरेको चर्चा गर्नुभयो ।
कार्यक्रममा अभिभावक शिक्षाको बारेमा सहजीकरण गर्दै कुशल प्रशिक्षक एवम् सहजकर्ता आचार्य लक्ष्मण भण्डारीले सचेत अभिभावक र अचेत अभिभावकका पहिचानबारे चर्चा गर्नुभएको थियो । हाम्रो समाजमा अभिभावकले गरिरहेका काम र व्यवहारमा सुधारको आवश्यकता औँल्याउँदै आचार्यले अभिभावकलाई अब सचेत अभिभावकका रूपमा अघि बढ्नका लागि प्रतिवद्धता व्यक्त गर्न अनुरोध समेत गर्नुभयो ।
समाजका विभिन्न क्षेत्रका लब्धप्रतिष्ठ व्यक्तिहरू समेतको उपस्थितिमा सम्पन्न कार्यक्रममा पत्रकार अर्जुन अधिकारीले कार्यक्रममा सहजीकरण गर्नुभएको थियो ।
जीवनदर्शन मनुष्य समाज र मानवीय जीवनपद्धतिका उज्याला आयामहरूलाई उद्घाटित गर्ने पवित्र उद्देश्यसहित सञ्चालित अनलाइन तथा मासिक पत्रिका हो । यसमा प्रकाशित हुने सबै प्रकारका सामग्री केवल कल्याण, कर्तव्य, अध्यात्म, आशा र उत्प्रेरणामा आधारित हुने गर्दछन् । यहाँ प्रकाशित हुने लेखरचनाले व्यक्तिभित्रको काम, क्रोध, लोभ, मोह, मद र मात्सर्यलाई घटाउँदै प्रेम, करुणा, विनय, स्वास्थ्य, सेवा र स्वाध्ययनलाई बढाउने प्रयास गर्ने छन् । हत्या, हिंसा, मारकाट, झैझगडा, छिनाझपटी, लुटपाटका दुःखदायी समाचारहरूबाट आशा, भरोशा, प्रेम, स्नेह, आनन्द, शान्तिजस्ता सकारात्मक समाचार र विचारतर्फ अभिप्रेरित हुन आम नेपालीलाई सहयोग पुगोस् भन्नु नै जीवनदर्शनको खास अभीष्ट हो ।
